പ്രശസ്ത ഇറാക്കി കവി അദ്നാൻ അൽ സയഗിന്റെ മൂന്ന് കവിതകൾ

1
പരാതി

ആകാശത്തേക്ക്  നോക്കി
മുടന്തൻ
നിലവിളിച്ചു:

ദൈവമേ
നിന്റെ കൈയിൽ
വേണ്ടത്ര കളിമണ്ണ്
ഇല്ലായിരുന്നുവെങ്കിൽ
എന്തിനാണ്
എന്നെ സൃഷ്ടിക്കാൻ
നീയിത്ര തിടുക്കം കാട്ടിയത്.

2

അസാന്നിദ്ധ്യം

മേശവിരിയിൽ
അയാളൊരു രാജ്യം വരച്ചു
പ്രകാശം വിതറും ചെറുവീടുകൾ, പാലങ്ങൾ, മരങ്ങളും പൂച്ചകളും.
പിന്നെ ഒരു ടിക്കറ്റ് വാങ്ങി
അവിടേക്ക് അയാൾ യാത്രയായി
തന്റെ ലഗേജുകളും മക്കളേയും ചുമന്ന്

അതിർത്തിയിൽ വെച്ച്
ഇൻസ്പെക്ടർ
ഒരു ബാർ‌ടെൻഡറെപ്പോലെ
അയാളെ കുലുക്കിയുണർത്തി
അക്രോശിച്ചു :
കണ്ട സ്വപ്നങ്ങളുടെ
ബില്ലടക്കാതെ
എങ്ങോട്ടാണ് നീ
തിരക്കിട്ട് ഓടിപ്പോകുന്നത്.

3

അസ്ത്രം

പെട്ടെന്നുള്ള മോചന നിമിഷത്തിൽ
ഒരസ്ത്രം എന്തിനെക്കുറിച്ചായിരിക്കും
ചിന്തിക്കുക
ഇരയെക്കുറിച്ചോ
അതോ സ്വാതന്ത്ര്യത്തെക്കുറിച്ചോ

മൊഴിമാറ്റം: കമറുദ്ദീൻ ആമയം